In fibberwarie 1989 waerde veur de alleriërste kiër ‘t “Aadwieverbal nieje sjtiël” gehaaje. “Nieje sjtiël” beteikende onger angere det d’r gèn mansluuj binne mochte, zellef neet nao 24.00 oer.
In ‘t kefee van de Patriot kwaam Jes Hendriks teveursjiën as ‘t 1e Aadwief. Hèt dors ’t sjpits waal aaf te biete, en ’t haet d’r noëts genne sjpiet van gehat. De zaal van de Patriot waerde neet gebroek, bang det d’r te weinig miense kwame om de zaal te vulle. ‘s aoves waas de kefee natuurlik vueël te klein.
De organisasie waas in henj van Miep Koch, José van Willick, Dorenda Faassen en Pauline Vullers. José Janssen-Pollen prizzenteerde ’t bal, en det is gelukkig nog altied neet verangert. José ging ‘s middigs d’r haer om te versiere en toen bleek det de Patriot gaar gènne vasteloaves meziek haaj. ‘t is toen sjnel nao hoës gegaon en haet de hiële middig plaetjes van de radio opgenaome.
In ’t twiëde jaor waas d’r ein georganizeerde koffietaofel. Op de daag van de verkaup looge om hallef zeve sjmorges al vrouwluuj in de gats mit dreugworst en bruüedjes.’t Waas oetverkoch, d’r waas neet veur idderein plaats. Ein aantal vrouwluuj kwame op ’t idee om boete zellef taofels neer te zitte, en sjpek met eier te gaon aete.
Al vriej snjel kreeg de koffietaofel häör eige cabaretières. Truus Rutten en Truus van der Beelen verraste de vrouwluuj vuuële jaore mit häör kreasies.
Nao de koffietaofel waerde d’r met de ‘gäöte mars’ gesjoëjd door Ruiver haer. Onger begeleiding van de Dorsvlaegels ginge ze via Ronckesjtein nao de Patriot, ein bein in de gäöt, ein bein oppe sjtoep. De Dorsvlaegels ammezeerde zich good, en zien noe nog sjteeds van de partie. ‘t ex-Aadwief waerde mit paerd en kèr door Piet Killaars mitgenaome. ‘t niej aadwief (aajwieverpop Truuj) waerde urges opgehaold, en den ‘s aoves om twellef oer verbrandj oppe merret. Idder jaor is ‘t weer sjpannend waem ‘t Niej Aadwief zal waere. ‘t is mènnig miens gebeurd det d’r toch zoë zeker wis waem ‘t Aadwief waerde en den achteraaf veur nieks blome haet gehaold.
In ’t ierste jaor haaj ’t Aadwief nog geine scepter. Jes kreeg ‘nne heksebessem, en dat waas geliëk de iërste ongersjeiing: ein zellef verzonne en hanjdgemaak sjpeldje of hengerke, altied in ’t Aadwiever thema. Van sjloefkes, heudjes, brilkes en sjtaofdeukskes toet klöpperkes en ummerkes mit echte zeip.
Nao ein paar jaor waerde ’t bal verplaats van de Patriot nao de Haam. Daonao kwaam sjteeds ein angere zaal aan de beurt, en dit roulatie systeem höbbe veur nag sjteeds.
In 2004 ontsjtong ‘t idee om ein ‘lijflied’ veur de Aajwiever te make, mit de bekende regel “Aadwief zien, is ’t sjónste in ’t laeve”. Pieter Classen, miens van ex-Aadwief Ginny, wilde helpe en zoë ontjstong ‘t liedje ‘Aadwief zien’. Tiedes de liedjesavond waerde de Aajwiever vanne Ruiver derde. Dit waas zoë sjoën det ’t liedje waerde opgenaome in de sjtudio van Jan Theelen. Dit bleek de sjtart van ein nuuje tradisie. Pieter zong vanaaf 2006 zellef ouch met, inmiddels höbbe ‘Pieter en de Aajwiever vanne Ruiver’ zellefs twië kiër in de finale van ‘t LVK gesjtaon.
In detzellefde jaor waerde veur ’t iërs ‘t Aadwiever Kiene georganiseert. Ruiverse ongernimmers bleke bereid om prachtige en dök komise priëze te sjponsore. Iddere iërste maondig nao de 11e van de 11e is ’t vaste prik veur de Aajwiever as veurluiper op de Vastelaovend.
In 2010 waerde ‘t 2×11 jäörig jubileum gevierd. Op ‘t Aadwieverbal kwaam Liana Peeters oet as Aadwief, ‘n echte verrassing veur ‘t comité (behalve veur de oetzeukkemmissie Pé en Monique natuurlik). D’r waas ‘n echte resepsie die knoetsj drök en gezellig waas. Wat höbbe veur gefiës!
In 2011 én in 2012 höbbe Pieter en de Aajwiever weer in de LVK finale moge sjtaon, ein höbbe d’r ein hiël sjoën fiës van gemaak. In oktoëber 2012 haet Pieter zien letste liedje gesjreve, nao 9 liedjes haet Pieter besjlaote om te sjtoppe, ‘t waas good gewaes.
In november 2013 höbbe veur ós 11-jäörig jubileum Aadwiever Kiene gevierd, kompleet met prosecco, gebak en ekstra sjoëne jubileum priëze.
De Aajwiever zien op tal van fronte aktief, mer ‘t Aadwieverbal zellef blief ’t hoëgtepunt. Inmiddels is ‘t Aadwieverbal nag sjteeds dé aovend veur alle vrouwluuj van Ruiver en omgaeving, jónk en aad!
Alle Aajwiever èns op ein riej;
|
1 Jes Hendriks |
1989 |
16 Marlies Niessen |
2004 |